Growth kampaniya deyil, sistemdir – niyə?
Bizneslərin çoxu growth-u hələ də bir hadisə kimi yaşayır. Nəsə edirik, nəsə olur, sonra hər şey sakitləşir. Sanki dalğa gəlir, vurur, çəkilir. Və biz növbəti dalğanı gözləyirik.
Bu gözləmə hissi çox yorucudur.
Hər dəfə eyni dövr:
motivasiya → hərəkət → nəticə → boşluq.
Boşluq isə ən təhlükəli yerdir. Çünki orada insan ya panikaya düşür, ya da səhv qərarlar verir.
Kampaniya düşüncəsi bizi daim “indi”yə kilidləyir. Bu həftə. Bu ay. Bu post. Bu reklam. Hər şey qısamüddətlidir. Halbuki biznes qısamüddətli düşüncə ilə böyümür. Sadəcə ayaqda qalır.
Sistem isə başqa cür işləyir. Sistem emosiyaya baxmır. Günün necə keçdiyinə baxmır. Sənin enerjin var ya yoxdur, vecinə deyil. O sadəcə işini görür.
Əgər growth sistemdirsə, sən artıq hisslərə görə yox, siqnallara görə hərəkət edirsən. “Məncə” azalır, “görünür ki” artır. Bu da qərarları sakitləşdirir. Dramı azaldır.
Əslində bir çox biznesdə problem reklamda, kontentdə, ya da büdcədə deyil. Problem ondadır ki, heç kim axını başdan sona xəritələməyib. Haradan gəlir, niyə gəlir, nə vaxt gedir – bunlar cavabsız qalır. Cavab olmayanda da insan hər şeyi “kampaniya” ilə həll etməyə çalışır.
Bir az da egodan danışaq. Kampaniya eqonu sevir. “Bu postu mən yazdım”, “bu reklamı mən qurmuşdum”. Sistem isə eqonu sevmir. Orada müəllif yoxdur, mexanizm var. Ona görə də çox adam sistem qurmaqdan qaçır. Çünki alqış azdır.
Amma maraqlı bir şey var. Sakit, alqışsız sistemlər bir müddət sonra çox səsli nəticələr verir. Kənardan baxanlar “birdən-birə böyüdü” deyir. Halbuki birdən-birə deyil. Sadəcə əvvəl səssiz idi.
Growth sistem olanda sən artıq hər şeyi böyütməyə çalışmırsan. Sadəcə bir şeyi azca yaxşılaşdırırsan. Bir mərhələni. Bir mesajı. Bir keçidi. Bu kiçik düzəlişlər zamanla yığılır. Və bir gün geri baxanda anlayırsan ki, biznes dəyişib.
Kampaniya isə sənə saxta sürət hissi verir. Hərəkət çoxdur, amma irəliləyiş azdır. Yorğunluq çoxdur, amma istiqamət yoxdur.
Bəlkə də growth-un ən rahatladan tərəfi budur: sən hər dəfə “nə edək?” sualını vermirsən. Sual dəyişir. “Bu harda axmır?” deyə soruşursan. Bu da daha yetkin sualdır.
Məncə, real growth elə buradan başlayır. Həyəcan azalanda. Səs azalanda. Tələsmə bitəndə. Yerinə düşüncə gələndə.
Growth kampaniya deyil, çünki kampaniya bitir.
Growth sistemdir, çünki səni gözləmədən davam edir.
Əgər bir gün heç nə etməsən belə, biznes hələ də nəfəs alırsa –
deməli sən artıq growth-u kampaniyadan çıxarmısan.
